ប្រធានបទ “រឿងអស្ចារ្យ៧យ៉ាងរបស់ប្រាសាទអង្គរវត្ត និងតំបន់អង្គរដែលកូនខ្មែរភាគច្រើនដឹងមិនអស់”

ប្រធានបទ “រឿងអស្ចារ្យ៧យ៉ាងរបស់ប្រាសាទអង្គរវត្ត និងតំបន់អង្គរដែលកូនខ្មែរភាគច្រើនដឹងមិនអស់”

អត្ថបទព័ត៌មានស្តីពីព្រឹត្តិការណ៍ និងការកម្សាន្ត
ក្រោមប្រធានបទ “រឿងអស្ចារ្យ៧យ៉ាងរបស់ប្រាសាទអង្គរវត្ត និងតំបន់អង្គរដែលកូនខ្មែរភាគច្រើនដឹងមិនអស់”
អត្ថបទដោយ : អ៊ាវ ណារី
#MJQE #AmericanInterconSchool

ប្រាសាទអង្គរវត្ត និងប្រជុំសំណង់ទាំងអស់នៃតំបន់អង្គរ បានបន្សល់ទុកអច្ឆរិយភាព និងអាថ៌កំបាំងរាប់មិនអស់សម្រាប់ប្រជាជនខ្មែរជំនាន់ក្រោយ។ សម្បត្តិបេតិកភណ្ឌមិនអាចកាត់ថ្លៃបានមួយនេះ គឺជាមរតកដ៏អស្ចារ្យដែលធ្វើឱ្យកម្ពុជា ល្បីរន្ទឺលើពិភពលោករហូតទាក់ទាញភ្ញៀវទេសចរបរទេសរាប់លាននាក់ចូលមកទស្សនាក្នុងមួយឆ្នាំៗ។ តើភាពអស្ចារ្យទាំង៧យ៉ាងនៃកេរមរតកមិនអាចកាត់ថ្លៃបាននៃប្រាសាទមួយនេះមានអ្វីខ្លះ?

១. អង្គរវត្ត ជាសំណង់ឧទ្ទិសសាសនាធំបំផុត ជាប់ក្នុងកំណត់ត្រាពិភពលោក Guinness
សំណង់ទាំងអស់នៃប្រជុំប្រាសាទអង្គរវត្ត ត្រូវបានសាងសង់ឡើងលើផ្ទៃដី ១៦២,៦ហិចតា ដែលជាសំណង់ឧទ្ទិសសាសនាធំជាងគេបំផុតក្នុងលោក ជាប់ក្នុងកំណត់ត្រា Guinness។ ព្រះបាទសូរ្យវរ្ម័នទី២ ជាអ្នកសាងសង់ប្រាសាទដ៏អស្ចារ្យនេះឡើងក្នុងឆ្នាំ១១១៣ ដល់១១៥០ ដើម្បីឧទ្ទិសដល់អាទិទេពសាសនាហិណ្ឌូនិកាយព្រះវិស្ណុ។

២. កាលពីឆ្នាំ២០១៤ អង្គរវត្តបានជាប់ចំណាត់ថ្នាក់លេខ១ នៅលើគេហទំព័រមួយដែលតែងតែយកតំបន់បុរាណវិទ្យា និងប្រវត្តិសាស្ត្រទាំងអស់លើពិភពលោកមកប្រៀបធៀបគ្នា នោះគឺគេហទំព័រ ArchaeoMadness។ បន្ទាប់មកទៀត នៅដើមឆ្នាំ២០១៥ អង្គរវត្តទទួលបានចំណាត់ថ្នាក់លេខ១ម្ដងទៀត នៅលើគេហទំព័រអន្តរជាតិ Trip Advisor។ នៅឆ្នាំ២០១៦កន្លងទៅ អង្គរបានបន្តជាប់លេខ១បន្ថែមទៀត នៅលើគេហទំព័ររបស់ក្រុមហ៊ុន Lonely Planet ដែលជាគេហទំព័រផ្សព្វផ្សាយ និងជាប្រភពព័ត៌មានទេសចរណ៍ដ៏ល្បីមួយលើ ពិភពលោក មានទាំងព័ត៌មានតាមរយៈវិបសាយ ទស្សនាវដ្ដី និងសៀវភៅ ជាដើម។ អង្គរវត្តទទួលបានលេខមួយ៤ឆ្នាំជាប់ៗគ្នាលើគេហទំព័របរទេសនានា
គេហទំព័រដ៏ល្បីល្បាញ Trip Advisor បានផ្ដល់ចំណាត់ថ្នាក់លេខ១ ដល់ប្រាសាទអង្គរវត្តរបស់កម្ពុជា ជាសំណង់ដ៏មានសារៈសំខាន់ផ្នែកប្រវត្តិសាស្ត្រអស្ចារ្យបំផុតរបស់ពិភពលោកសម្រាប់ឆ្នាំ២០១៧ បន្ទាប់ពីទទួលបានការបោះឆ្នោតគាំទ្រយ៉ាងច្រើនពីភ្ញៀវទេសចរបរទេស។

៣. តំបន់អង្គរ ជាសម្បត្តិបេតិកភណ្ឌពិភពលោកដំបូងគេរបស់កម្ពុជា
តំបន់អង្គរលាតសន្ធឹងលើផ្ទៃដីប្រមាណ ៤០០គីឡូម៉ែត្រក្រឡា ដែលមានប្រាសាទបុរាណជាច្រើន រាប់បញ្ចូលទាំងព្រៃឈើចម្រុះនៅជុំវិញ។ តំបន់ប្រវត្តិសាស្ត្រនេះជាទីតាំងនៃប្រាសាទអង្គរវត្ត ប្រាសាទអង្គរធំ និងប្រាសាទបាយ័នដ៏ល្បីល្បាញរបស់ព្រះរាជាណាចក្រកម្ពុជា និងត្រូវអង្គការ UNESCO ប្រកាសដាក់ចូលជាសម្បត្តិបេតិកភណ្ឌវប្បធម៌រូបីពិភពលោកក្នុងឆ្នាំ១៩៩២។

៤. បាតុភូតព្រះអាទិត្យរះចំកំពូលប្រាសាទអង្គរវត្ត កើតឡើងជាប្រចាំរាល់ឆ្នាំ
លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បានប្រាប់ឱ្យដឹងថា បាតុភូតកម្រនេះកើតឡើងជាប្រចាំរាល់ឆ្នាំ គឺនៅចន្លោះពីថ្ងៃទី២១ ដល់ថ្ងៃទី២៣ ខែកញ្ញា និងម្ដងទៀតក្នុងខែមិនា។ បើតាម Science Channel បានឱ្យដឹងថា ព្រឹត្តិការណ៍នេះឈ្មោះថា អ៊ីខ្វីណក់ (ជាពេលព្រះអាទិត្យរះចំកណ្ដាលកំពូលប្រាសាទអង្គរវត្ត) ដែលរន្ធមួយនៅចំកំពូលកណ្ដាលនៃប្រាសាទនឹងទទួលពន្លឺព្រះអាទិត្យចាំងទៅក្រោមនៃចំណុចផ្ចិតខាងក្រោមប្រាសាទ។ ពន្លឺចែងចាំងព្រះអាទិត្យក្នុងព្រឹត្តិការណ៍ថ្ងៃរះចំណុចកំពូលប្រាសាទនេះត្រូវបានគេជឿថា វាបានបញ្ជូនពន្លឺព្រះអាទិត្យនោះទៅបន្ទប់អាថ៌កំបាំងមួយ ផ្នែកជាន់ក្រោមដីនៃប្រាសាទអង្គរវត្តដែលមានជម្រៅប្រមាណជាង៣០ម៉ែត្រ។ អ្នកជំនាញខ្លះបានជឿជាក់ថាព្រះបាទជ័យវរន្ម័ទី២ រចនាកន្លែងសម្ងាត់នេះ គឺដើម្បីរក្សាអដ្ឋិធាតុរបស់ព្រះអង្គពេលសុគត។

៥. ស្ថាបត្យករបុរាណ ជីកគូទឹកដើម្បីការពារប្រាសាទ រហូតឈរបានជាច្រើនរយឆ្នាំ
យោងតាមវីដេអូឯកសារស្រាវជ្រាវស្ដីពីការកសាងប្រាសាទអង្គរវត្ត ដោយបុរាណវិទូជនជាតិបារាំងបានបង្ហាញថា ស្ថាបត្យករក្នុងសម័យអង្គរ បានជីកធ្វើជាគូទឹកនេះឡើង គឺដើម្បីការពារដល់តួប្រាសាទអង្គរវត្តទាំងមូលតែម្ដង។ តាមរយៈវីដេអូនោះ បានឱ្យដឹងទៀតថា ស្ថាបត្យករដ៏អស្ចារ្យក្នុងសម័យនោះ បានយកដីខ្សាច់ដើម្បីចាក់គ្រឹះកសាងប្រាសាទអង្គរវត្ត ព្រោះបុព្វបុរសខ្មែរជឿថា ដីខ្សាច់អាចធ្វើឱ្យតួប្រាសាទឈររឹងមាំបានរាប់ពាន់ឆ្នាំ។

៦. ចម្រឹងបង្អួចប្រាសាទអង្គរវត្តជះស្រមោលចេញកំពូលប្រាំដូចកំពូលប្រាសាទអង្គរវត្ត
ចម្រឹងនៃបង្អួចប្រាសាទអង្គរវត្តបានបង្កប់នូវអាថ៌កំបាំងដ៏អស្ចារ្យ ស្ទើរគ្មាននរណាម្នាក់ចាប់អារម្មណ៍នោះឡើយ។ បើតាមការឱ្យដឹងពី លោក កាន់ សុខម៉េង មគ្គុទ្ទេសក៍ភាសាបារាំង អង់គ្លេស និងថៃ បានស្រាយពីអាថ៌កំបាំងនេះថា ស្រមោលពន្លឺថ្ងៃនៃចម្រឹងបង្អួចប្រាសាទអង្គរវត្ត គឺជាប្រាសាទកំពូលប្រាំ និងកំពូល៣។

៧. មានសំណង់ជាច្រើនទៀត កប់ក្នុងដីក្រោមប្រាង្គប្រាសាទអង្គរវត្ត
កាលពីដើមឆ្នាំ២០១៥ សារព័ត៌មានអង់គ្លេស Daily Mail បានចុះផ្សាយថា ក្រុមបុរាណវិទូបានរកឃើញសំណង់បុរាណខ្សាច់ដ៏ធំមួយរួមជាមួយសំណង់កប់ក្នុងដីជាច្រើននាបរិវេណខាងក្រោមនៃប្រាង្គប្រាសាទអង្គរវត្ត ដែលជាការគាស់បើកនូវអាថ៌កំបាំងថ្មីមួយទៀត ទាញបានចំណាប់អារម្មណ៍អ្នកស្រាវជ្រាវទូទាំងពិភពលោក។ ក្រុមអ្នកស្រាវជ្រាវមកពីសាកលវិទ្យាល័យ Sydney បានស្រាវជ្រាវនៅកម្ពុជាក្នុងគម្រោងមួយឈ្មោះ Greater Angkor Project ដោយប្រើបច្ចេកវិទ្យាឡាស៊ែរ LiDAR ជាមួយរ៉ាដា ពួកគេបានរកឃើញ និងជីករកសំណង់បុរាណជាច្រើនកប់ក្នុងដីអាថ៌កំបាំងនោះ។ កាលពីមុន គេជឿថាប្រាសាទអង្គរវត្តរបស់កម្ពុជា គឺស្ថិតក្នុងទីកន្លែងសក្ការបូជា ប៉ុន្តែបន្ទាប់ពីរកឃើញសំណង់បុរាណដីខ្សាច់រាងរង្វង់ធំមួយ ព្រមទាំងសំណល់នៃសំណង់បុរាណកប់ក្នុងដីនេះមក បុរាណវិទូជាច្រើនបាននិយាយថា ប្រាសាទអង្គរវត្ត គឺមានភាពស្មុគស្មាញ និងអាថ៌កំបាំងជាងការគិតទៅទៀត។

ក្រៅពីចំណុចទាំង៧ ខាងលើនេះ នៅមានរឿងរ៉ាវអស្ចារ្យជាច្រើនទៀត ដែលធ្វើឱ្យប្រាសាទអង្គរវត្តល្បីឈ្មោះទូទាំង ពិភពលោក រហូតមានប្រទេសនានាចម្លងតាម។ ចំណែកក្រុមអ្នកស្រាវជ្រាវនានា នៅតែបញ្ចេញរបកគំហើញថ្មីៗបន្តបន្ទាប់ ក្រោយពេលរុករកអាថ៌កំបាំងនៅតំបន់នេះ៕

ដកស្រង់ចេញពី៖ https://news.sabay.com.kh/article/946171

No Comments

Sorry, the comment form is closed at this time.

Back to Top
សាលារៀន អន្ដរទ្វីប អាមេរិកាំង