តើការចូលរួមការងារស្ម័គ្រចិត្តមានសារប្រយោជន៍អ្វីខ្លះ?

ការងារស្ម័គ្រចិត្ត គឺជាការចូលរួមធ្វើសកម្មភាពអ្វីមួយដោយមិនគិតពីប្រាក់កម្រៃ ឬប្រយោជន៍ផ្ទាល់ខ្លួន។ ការស្ម័គ្រចិត្តអាចស្ថិតក្នុងរូបភាពច្រើនយ៉ាងដូចជា ការជួយធ្វើការងារសង្គម ការជួយដល់អ្នកដ៏ទៃ ការជួយសហគមន៍ ឬប្រទេសជាតិរបស់យើង។ ការធ្វើការងារស្ម័គ្រចិត្តមានអត្ថប្រយោជន៍ច្រើនយ៉ាងដូចជា៖

១. ជួយឱ្យយើងរស់នៅបានយូរ និងល្អសម្រាប់សុខភាព៖ តាមការស្រាវជ្រាវបានឱ្យដឹងថា អ្នកដែលចូលរួមធ្វើការងារស្ម័គ្រចិត្តរស់នៅដោយរីករាយ និងមានសុខភាពល្អជាងអ្នកដែលមិនបានចូលរួមធ្វើការងារស្ម័គ្រចិត្ត។

២. កាត់បន្ថយភាពតានតឹង៖ អ្នកជំនាញបាននិយាយថា នៅពេលដែលយើងផ្តោតអារម្មណ៍របស់យើងទៅលើការងារអ្វីមួយ ឬនរណាម្នាក់ឱ្យបានច្រើនជាងគិតតែពីរឿងខ្លួនឯង អាចធ្វើឱ្យយើងមិនសូវប្រឈមនឹងបញ្ហាស្ត្រេស។ ម្យ៉ាងវិញទៀត វាជួយឱ្យយើងមានការគិតប្រកបដោយសុទិដ្ឋិនិយម អាចគ្រប់គ្រងអារម្មណ៍ខ្លួនឯងបានល្អ។

៣. បង្កើនចំណងមិត្តភាព៖ នៅពេលដែលយើងធ្វើការងារស្ម័គ្រចិត្ត យើងមានឱកាសក្នុងការជួបនូវមនុស្សថ្មីៗជាច្រើន ព្រមទាំងអាចរៀនបានច្រើនពីពួកគេផងដែរ។ នេះគឺជាចំណុចមួយដែលសំខាន់បំផុត ព្រោះថាមនុស្សយើងម្នាក់ៗតែងតែត្រូវការពឹងពាក់គ្នាទៅវិញទៅមក ហើយប្រសិនបើយើងស្គាល់មនុស្សឱ្យបានកាន់តែច្រើន ឱកាសការងារ និងភាពជោគជ័យក៏មានច្រើនជាងអ្នកដែលមិនសូវបានធ្វើការងារស្ម័គ្រចិត្ត។

៤. ជួយដល់ការដាក់អាហារូបករណ៍៖ ធម្មតានៅពេលដែលគេសម្រេចចិត្តឱ្យអាហារូបករណ៍យើងទៅរៀននៅបរទេសក្តី ឬអាហារូបករណ៍ក្នុងស្រុកក្តី ជានិច្ចកាលគេចង់ដឹង ចង់ឃើញថាតើយើងជាបុគ្គលម្នាក់ដែលមានគំនិតគិតពីសង្គមដែរឬទេ ឬក៏ជាបុគ្គលដែលគិតតែពីប្រយោជន៍សួនតួ។

៥. ជាឱកាសដែលយើងអាចរៀនអ្វីដែលថ្មី៖ យើងអាចទទួលបានចំណេះដឹងថ្មីៗជាច្រើន ដឹងថាដើម្បីធ្វើការងារអ្វីមួយ យើងត្រូវឆ្លងកាត់ដំណាក់កាលអ្វីខ្លះ ត្រូវរៀបចំបែបណា។ យើងអាចមានបពិសោធន៍ជាច្រើនបន្ទាប់ពីចូលរួមធ្វើការងារស្ម័គ្រចិត្ត។

៦. អភិវឌ្ឍនូវបុគ្គលិកលក្ខណៈផ្ទាល់ខ្លួន និងយល់ដឹងពីសង្គមច្រើន៖ ក្រោយពីបានជួបមនុស្សថ្មី និងធ្វើការងារជាច្រើន វាជួយឱ្យយើងមានភាពរហ័សរហួន មានទំនួលខុសត្រូវ និងយល់ពីសង្គមបានច្រើនជាងមុន។ ជាទូទៅការធ្វើការងារ ខុសពីទ្រឹស្តីដែលយើងបានរៀន ព្រោះថាយើងបានរៀនផ្ទាល់ ជួបផ្ទាល់នូវបញ្ហាសង្គមដែលយើងកំពុងតែជួបប្រទះ។

៧. ស្វែងយល់ពីខ្លួនឯងបានកាន់តែច្រើន៖ អ្នកខ្លះមិនសូវច្បាស់ក្នុងចិត្តថា នៅថ្ងៃអនាគតខ្លួនចង់ធ្វើអ្វីឱ្យពិតប្រាកដ ជាពិសេសមិនដឹងថាខ្លួនមានទេពកោសល្យអ្វី ពេលខ្លះបន្ទាប់ពីធ្វើការងារស្ម័គ្រចិត្តហើយ យើងអាចរកឃើញថា ខ្លួនចូលចិត្តអ្វី ពូកែអ្វី ហើយការងារអ្វីដែលសាកសមនឹងខ្លួន។

៨. ចូលរួមជួយសហគមន៍របស់យើង៖ នេះជាឱកាសដ៏ពិសិដ្ឋសម្រាប់យុវជន យុវតី ក៏ដូចជាបុគ្គលគ្រប់រូបក្នុងការតបស្នង និងជួយទៅកាន់សង្គម ឬប្រទេសជាតិដែលយើងរស់នៅ ព្រោះយើងត្រូវចាំថាយើងគ្រប់គ្នាជាកោសិកាដ៏សំខាន់ដែលជួយធ្វើឱ្យប្រទេសជាតិរីកចម្រើនបាន។

ការចូលរួមធ្វើការងារស្ម័គ្រចិត្ត មិនចាំបាច់តែជួយក្នុងលក្ខណៈទ្រង់ទ្រាយធំនោះទេ យើងគ្រាន់តែចាប់ ផ្តើមគិតថា តើយើងអាចធ្វើអ្វីបានខ្លះ ជួយអ្វីបានខ្លះដល់សង្គមមួយនេះ ហើយចាប់ផ្តើមធ្វើវា ព្រោះថាការងារស្ម័គ្រចិត្តមិនត្រឹមតែអាចផ្តល់ផលប្រយោជន៍ដល់សង្គមនោះទេ វាក៏អាចជួយដល់ខ្លួនយើងផ្ទាល់បានយ៉ាងច្រើនផងដែរ។

អត្ថបទដកស្រង់ចេញពីគេហទំព័រ៖ http://khmereducator.org/post/article/773/