គន្លឹះប្រាំសម្រាប់យុវជនមានអារម្មណ៍ថប់បារម្

គន្លឹះប្រាំសម្រាប់យុវជនមានអារម្មណ៍ថប់បារម្

អត្ថបទព័ត៌មានស្តីពីសុខភាព
ក្រោមប្រធានបទ “គន្លឹះប្រាំសម្រាប់យុវជនមានអារម្មណ៍ថប់បារម្ភ”
អត្ថបទដោយ : ជាង ប៊ុនលី
#MJQE #American Intercon School

យើងទាំងអស់គ្នាសុទ្ធតែមានអារម្មណ៍ថប់បារម្ភពីពេលមួយទៅពេលមួយ នៅពេលដែលយើងប្រឈមមុខនឹងភាពមិនច្បាស់លាស់ ភាពភ័យខ្លាច ឬបញ្ហាប្រឈមនានា។ ភាពថប់បារម្ភ គឺជាអារម្មណ៍ធម្មជាតិរបស់មនុស្ស ដែលត្រូវបានកើតឡើង ដើម្បីជួយឱ្យយើងមានសុវត្ថិភាពពីការគំរាមកំហែងដែលអាចកើតមាន។ ភាពថប់បារម្ភរមែងធ្វើឱ្យយើងមានអារម្មណ៍ដូចជាមិនងាយស្រួល ឬការព្រួយបារម្ភ។ អ្នកក៏អាចមានរោគសញ្ញាមួយចំនួនលើផ្លូវកាយផងដែរដូចជា អត្រាចង្វាក់បេះដូងខ្ពស់ ការដកដង្ហើមលឿន ឈឺក្បាល ឬបញ្ហាឈឺក្រពះ។ ជាពិសេស យុវជនឆ្លងកាត់ការផ្លាស់ប្ដូរ និងបទពិសោធថ្មីៗជាច្រើនអាចបណ្តាលឱ្យមានអារម្មណ៍ថប់បារម្ភ ហើយវាជារឿងធម្មតា។ ការរាតត្បាតនៃជំងឺកូវីដ-១៩ បាននាំមកនូវបញ្ហាប្រឈមជាច្រើន ដែលបង្កើនហានិភ័យនៃភាពថប់បារម្ភចំពោះមនុស្សជាច្រើន។ វាអាចមានអារម្មណ៍តានតឹងខ្លាំង ប៉ុន្តែមានសកម្មភាពមួយចំនួនដែលយើងទាំងអស់គ្នាសុទ្ធតែអាចធ្វើបាន ដើម្បីកុំឱ្យបញ្ហានេះគ្រប់គ្រងយើង។ នេះគឺជាជំហានទាំងប្រាំ ដើម្បីសាកល្បង។

១. ដកដង្ហើមវែង
ដកដង្ហើមយឺតៗចូលតាមច្រមុះ និងចេញតាមមាត់។ សូមធ្វើបែបនេះច្រើនដង រហូតដល់អ្នកស្ងប់អារម្មណ៍។ ការដកដង្ហើមយឺតៗឱ្យចូលទៅដល់ក្បាលពោះដោយចេតនា គឺជាវិធីងាយ និងមានប្រសិទ្ធភាពបំផុតក្នុងការកាត់បន្ថយភាថប់បារម្ភដោយសារការបង្កើនការផ្គត់ផ្គង់អុកស៊ីសែនទៅដល់ខួរក្បាលរបស់យើង និងជួយធ្វើឱ្យស្ងប់អារម្មណ៍។ ការដកដង្ហើមលឿន គឺជារឿងធម្មតា នៅពេលអ្នកកំពុងថប់បារម្ភ ហើយវាពិតជាបង្កឱ្យមានរោគសញ្ញាលើផ្លូវកាយជាច្រើនដូចជា ការស្ពឹកស្រពន់ពេញរាងកាយ ដែលបង្កឱ្យមានភាពថប់បារម្ភកាន់តែខ្លាំង។ អ្នកអាចពិចារណាបញ្ចូលលំហាត់ដកដង្ហើមប្រចាំថ្ងៃនៅក្នុងទម្លាប់របស់អ្នក ឬសាកល្បងបច្ចេកទេសសម្រាកសាច់ដុំជាបន្តបន្ទាប់ (ដែលអ្នកបន្តឹង និងបន្ធូរក្រុមសាច់ដុំជាក់លាក់) ការធ្វើបែបនេះអាចធ្វើឱ្យរាងកាយសម្រាក និងបង្វែរអារម្មណ៍អ្នកចេញពីការព្រួយបារម្ភ។

២. និយាយជាមួយមិត្តភក្ដិ ឬមនុស្សដែលអ្នកទុកចិត្ត
ប្រាប់អ្នកណាម្នាក់អំពីអារម្មណ៍របស់អ្នក និងសាកសួរថាពីអារម្មណ៍របស់គេផងដែរ។ ការនិយាយជាមួយអ្នកណាម្នាក់ទៀត អាចជួយយើងសម្រាលសម្ពាធមួយចំនួន ដែលយើងបង្កើតឡើងកាន់តែច្រើននៅក្នុងចិត្តរបស់យើង និងក៏ជួយបំបែកវិធីនានា ដើម្បីដោះស្រាយបញ្ហាដែលបង្ក ឬរួមចំណែកធ្វើឱ្យថប់បារម្ភរបស់អ្នកផងដែរ។ សូមចងចាំថា អ្នកអាចជាការគាំទ្រយ៉ាងសំខាន់ចំពោះអ្នកណាម្នាក់ ដែលកំពុងមានអារម្មណ៍ថប់បារម្ភផងដែរ សូមព្យាយាមបង្កើតទំនាក់ទំនងជាមួយអ្នកណាម្នាក់នៅក្នុងសប្ដាហ៍នេះ។

៣. វិលត្រលប់ទៅតម្រូវការមូលដ្ឋានវិញ
នៅពេលតម្រូវការមូលដ្ឋានដូចជា ការទទួលទានដំណេក និងការទទួលទានអាហារល្អៗ មិនត្រូវបានបំពេញ យើងងាយនឹងមានអារម្មណ៍ថប់បារម្ភ និងមិនស្រួលខ្លួន។ សូមថែទាំសុខភាពផ្លូវកាយរបស់អ្នកនៅសប្ដាហ៍នេះ ដោយផ្ដោតលើការទទួលទានដំណេកស្កប់ស្កល់ និងការទទួលទានអាហារល្អ និងធ្វើសកម្មភាពផ្លូវកាយមួយចំនួន និងពិនិត្យមើលអំពីភាពខុសគ្នា ដែលសកម្មភាពនេះអាចបានបង្កើតឡើង។ នៅពេលខ្លះ មនុស្សទទួលទានជាតិកាហ្វេអ៊ីន ឬការព្យាបាលដោយខ្លួនឯងជាមួយសារធាតុនានាដូចជា ថ្នាំជក់ និងគ្រឿងស្រវឹង ដើម្បីសម្រាលអារម្មណ៍ពីភាពថប់បារម្ភ ប៉ុន្តែការធ្វើបែបនេះធ្វើឱ្យយើងរិតតែថប់បារម្ភកាន់តែខ្លាំងនៅក្នុងរយៈពេលវែង។

៤. បញ្ចូលសកម្មភាពធ្វើឱ្យស្ងប់អារម្មណ៍នៅក្នុងទម្លាប់ប្រចាំថ្ងៃអ្នក
សូមសាកល្បងចំណាយពេលយ៉ាងតិចមួយម៉ោងធ្វើសកម្មភាពមួយ ដែលធ្វើឱ្យអ្នកមានអារម្មណ៍កាន់តែល្អដូចជា អានសៀវភៅដែលអ្នកចូលចិត្ត គូរគំនូរ ឬសរសេរអត្ថបទ។ សូមសាកល្បង និងដាក់កំហិតចំពោះកិច្ចការនានា ដែលអាចធ្វើឱ្យយើងថប់បារម្ភកាន់តែខ្លាំងដូចជា ការតាមដានព័ត៌មានជាញឹកញាប់ ឬមើលព័ត៌មានច្រើនលើបណ្ដាញទំនាក់ទំនងសង្គមរបស់អ្នក។ ការមានអារម្មណ៍មិនបានត្រៀមលក្ខណៈ និងការប្រញាប់ប្រញាល់ក៏អាចបង្កឱ្យមានភាពថប់បារម្ភ និងភាពតានតឹងក្នុងចិត្តជាច្រើនផងដែរ។ ប្រសិនបើអ្នកដឹងថា អ្នកនឹងមានអ្វីមួយដែលសំខាន់នៅក្នុងពេលខាងមុខឆាប់ៗនេះដូចជា ការប្រឡងនៅសាលារៀន ឬការបរិច្ឆេទកំណត់ប្រគល់ការងារនៅកន្លែងធ្វើការ សូមព្យាយាមរៀបចំផែនការជាមុន និងផ្ដល់ពេលវេលាឱ្យខ្លួនឯងសម្រាប់ត្រៀម។

៥. ស្វែងរកការគាំទ្របន្ថែម
ប្រសិនបើអ្នកមានរោគសញ្ញាថប់បារម្ភច្រើនជាប្រចាំ ដែលរំខានជីវិតប្រចាំថ្ងៃរបស់អ្នក សូមគិតអំពីផលប៉ះពាល់អវិជ្ជមាននៃភាពថប់បារម្ភមកលើគុណភាពជីវិត ការសិក្សា ការងារ ទំនាក់ទំនង និងសមត្ថភាពរបស់អ្នកក្នុងថែទាំខ្លួន ឬមិនសមាមាត្រជាមួយនឹងវិធីដែលអ្នកអាចឆ្លើយតបជាធម្មតានៅក្នុងស្ថានភាពតានតឹងក្នុងចិត្ត។ នៅពេលរឿងរ៉ាវតានតឹងខ្លាំងពេកធ្វើឱ្យអ្នកមិនអាចដោះស្រាយដោយខ្លួនអ្នកបាន សាលារៀនរបស់អ្នក មណ្ឌលសុខភាព ឬសេវាសហគមន៍ដទៃទៀតអាចផ្ដល់ការគាំទ្រយ៉ាងសំខាន់ដល់អ្នកបាន។ ការសុំជំនួយ គឺជាសិទ្ធិមនុស្សរបស់អ្នក និងគឺជាសញ្ញានៃភាពខ្លាំង ដោយវាបង្ហាញនូវការយល់ដឹងអំពីខ្លួនឯង និងសេចក្ដីក្លាហានក្នុងការជម្នះអ្វីមួយដែលពិបាក។ ប្រសិនបើអ្នកមិនដឹងអំពីកន្លែងដែលទទួលជំនួយ សូមសួរអ្នកណាម្នាក់ ដែលអ្នកទុកចិត្ត ឬស្រាវជ្រាវតាមប្រព័ន្ធអនឡាញ ដើម្បីស្វែងរកការគាំទ្រ ដែលមាននៅក្នុងប្រទេសរបស់អ្នក។

ដកស្រង់ចេញពី : www.unicef.org/cambodia/km/
គន្លឹះប្រាំ សម្រាប់យុវជនមានអារម្មណ៍ថប់បារម្ភ | អង្គការយូនីសេហ្វ អង្គការយូនីសេហ្វ (unicef.org)

No Comments

Sorry, the comment form is closed at this time.

Back to Top
សាលារៀន អន្ដរទ្វីប អាមេរិកាំង